Tom Felton

Tomas Endryu Felton (1987-yil 22-sentabrda tugʻilgan) — J. K. Roulingning bestseller asarlari asosida suratga olingan «Garri Potter» filmlarida Drako Malfoy roli bilan tanilgan ingliz aktyori. Surreyda tugʻilgan Felton ijodini reklamalardan boshlagan va kinodagi debyutini «Qarzga oluvchilar» (1997) filmidagi Pigrin Klok roli bilan amalga oshirgan. «Anna va qirol» (1999) filmida Lui T. Leonovens rolini oʻynagach, «Garri Potter va faylasuf toshi» (2001) filmiga tasdiqlangan. Felton soʻnggi qism — «Garri Potter va Ajal tuhfalari: 2-qism» (2011) gacha boʻlgan yettita davomiylikda suratga tushgan. Shuningdek, «Maymunlar sayyorasi: Isyon» (2011) ilmiy-fantastik filmida koʻrinish bergan, keyinchalik «Maydondan» (2011) va «Arvoh» (2012) kabi mustaqil filmlarda rollar ijro etgan. Felton «Labirint» tarixiy miniserialida vikont Trenkavel va tanqidchilar olqishiga sazovor boʻlgan «Bell» (2013) tarixiy dramasida Jeyms Ashford rollarini oʻynagan. 2015-yilda TNT telekanalining «Birinchi qotillik» serialida qotillikda gumon qilingan qahramon obrazini gavdalantirgan. 2016-yilda Toronto xalqaro kinofestivalida namoyish etilgan «Qiroldan xabar» hamda «Birlashgan Qirollik» filmlarida suratga tushgan. U komikslar asosida suratga olingan The CW telekanalining «Flesh» serialida Doktor Alximik rolini gavdalantirgan. Shuningdek, «Yem» (2017) dramasi, «Stratton» (2017) jangari-trileri va «Megan Levi» (2017) biografik filmida bosh rollarni boʻlishgan. 2018-yilda ilmiy-fantastik «Kelib chiqish» serialida doimiy rol ijro etgan hamda Kler Makkartining «Ofeliya» (2018) filmida Laert obrazini talqin qilgan (har ikkala ijrosi ham yuqori baholangan). Felton oilaviy qoʻrqinchli filmida salbiy qahramonni gavdalantirgan.