Robbie Coltrane

Entoni Robert Makmillan (1950-yil 30-mart – 2022-yil 14-oktyabr), Robbie Coltrane nomi bilan mashhur shotlandiyalik aktyor va komik. U Harry Potter film seriyasidagi (2001–2011) Rubeus Hagrid hamda Jeyms Bond haqidagi GoldenEye (1995) va The World Is Not Enough (1999) filmlaridagi Valentin Dmitrovich Zukovskiy rollari bilan butun dunyoga tanilgan. 2006-yilda qirolicha Yelizaveta II tomonidan drama sohasidagi xizmatlari uchun OBE ordeni bilan taqdirlangan. 1990-yilda Evening Standard British Film Award mukofotini qo‘lga kiritgan, 2011-yilda esa Britaniya kino akademiyasining Shotlandiya bo‘limi tomonidan kino san’atiga qo‘shgan ulkan hissasi uchun taqdirlangan. Karyerasini Xyu Lori, Stiven Fray va Emma Tompson bilan birga Alfresco (1983–1984) eskizlar shousida boshlagan. 1987-yilda Tutti Frutti miniserialida suratga tushib, ilk bor Britaniya kino akademiyasining (BAFTA) eng yaxshi aktyor nominatsiyasiga sazovor bo‘lgan. Keyinchalik Cracker (1993–2006) serialida jinoiy psixolog Eddi Fitsjerald rolini o‘ynab, ketma-ket uch yil (1994–1996) mobaynida eng yaxshi aktyor sifatida BAFTA mukofotiga loyiq ko‘rilgan. 2016-yilda National Treasure serialidagi ijrosi uchun ham BAFTA nominatsiyasini olgan.