Emma Watson

Emma Sharlotta Dyurr Uotson (1990-yil 15-aprelda tugʻilgan) — ingliz aktrisasi va faoli. U ham blokbasterlarda, ham mualliflik kinolarida yaratgan rollari hamda ayollar huquqlarini himoya qilishdagi faoliyati bilan tanilgan. Uotson Forbes va Vanity Fair jurnallari tomonidan dunyodagi eng koʻp haq toʻlanadigan aktrisalar qatoriga kiritilgan, shuningdek, 2015 yilda Time jurnali tomonidan dunyoning 100 ta eng nufuzli kishilaridan biri deb topilgan. Uotson Dragon maktabida oʻqigan va Stagecoach Theatre Arts oʻquv markazining Oksford filialida aktyorlik mahoratini egallagan. U maktab spektakllarigagina qatnashib yurgan paytlaridayoq, "Garri Potter" filmlar seriyasida Germiona Greynjer rolini qoʻlga kiritib, bolaligiyoq yulduzga aylandi. Shuningdek, 2007-yilda "Balet tufelchalari" nomli teleserialda suratga tushgan va "Despero sarguzashtlari" (2008) animatsion filmiga ovoz bergan. Garri Potter haqidagi soʻnggi filmdan soʻng u "Merilin bilan oʻtgan haftam" (2011) filmida ikkinchi darajali rolni ijro etdi, keyinchalik "Gulduvonalikning mashaqqatlari" (2012) dramasida erkin tabiatli talaba Sam rolini oʻynab, tanqidchilar olqishiga sazovor boʻldi. Sofiya Koppolaning "Bling Halqasi" (2013) filmidagi Aleksis Neyers obrazi hamda "Nuh" epik dramasidagi asrab olingan qiz roli uning shuhratini yanada oshirdi. Oʻsha yili u Britaniya kino va televideniye sanʼati akademiyasi (BAFTA) tomonidan "Yilning britaniyalik artisti" unvoniga sazovor boʻldi. U shuningdek, barcha zamonlarning eng koʻp daromad keltirgan filmlari qatoriga kiruvchi "Goʻzal va maxluq" (2017) myuziklida Bell rolini va Meg March obrazini gavdalantirgan.