Daniel Radcliffe

Deniel Jeykob Redkliff (1989-yil 23-iyulda tugʻilgan) — ingliz aktyori. U oʻn ikki yoshida shu nomdagi film seriyasida Harri Potter rolini oʻynay boshlab shuhrat qozondi hamda turli kino va teatr rollarini ijro etib kelmoqda. Faoliyati davomida Redkliff koʻplab mukofotlar va nominatsiyalarni qoʻlga kiritgan. Redkliff aktyorlikdagi debyutini 10 yoshida BBC One telekanalining "David Copperfield" (1999) televizion filmida amalga oshirgan, shundan soʻng "The Tailor of Panama" (2001) badiiy filmida suratga tushgan. Oʻsha yili u J.K. Rowlingning fantastik romani asosida suratga olingan "Harry Potter and the Philosopher's Stone" filmida Harri Potter rolini ijro etdi. Keyingi oʻn yil ichida u ushbu personajni yana yettita davomiy qismida gavdalantirdi va bu "Harry Potter and the Deathly Hallows – Part 2" (2011) bilan yakunlandi. Bu davrda u dunyodagi eng koʻp haq toʻlanadigan aktyorlardan biriga aylandi va butun dunyoga tanilib, muxlislar va tanqidchilar eʼtirofiga sazovor boʻldi. Harri Potter muvaffaqiyatidan soʻng Redkliff "What If?" (2013) rom-komida suratga tushdi, shuningdek, "The Woman in Black" (2012) qoʻrqinchli filmida huquqshunos Artur Kipps, "Kill Your Darlings" (2013) drama filmida shoir Allen Ginzberg, "Victor Frankenstein" (2015) ilmiy-fantastik qoʻrqinchli filmida Igor, "Swiss Army Man" (2016) komediya-dramasida gaplashuvchi jasad, "Now You See Me 2" (2016) trillerida texnologik daho Valter Mabri va "Imperium" (2016) tanqidchilar eʼtirofiga sazovor boʻlgan trillerida FBR agenti Neyt Foster rollarini oʻynadi. 2019-yildan beri u TBS telekanalining "Miracle Workers" antologiya serialida bosh rolni ijro etib kelmoqda.