Jordana Brewster

Jordana Brewster (1980-yil 26-aprelda tug'ilgan) — amerikalik aktrisa. U aktrisalikdagi debyutini 1995-yilda "All My Children" serialining bir epizodida amalga oshirgan. Shundan so'ng "As the World Turns" serialida Nikki Manson rolini ijro etib, 1997-yilgi "Soap Opera Digest Award" mukofotining "O'smir yoshdagi eng yaxshi aktrisa" nominatsiyasiga sazovor bo'lgan. U kinodagi ilk rolini Robert Rodrigesning "The Faculty" (1998) ilmiy-fantastik qo'rqinchli filmida o'ynagan. Brewsterga haqiqiy mashhurlikni "The Fast and the Furious" (2001) jangari filmidagi Mia Torettosi roli olib keldi. U bu rolni filmlarning davomi bo'lgan "Fast & Furious" (2009), "Fast Five" (2011), "Fast & Furious 6" (2013), "Furious 7" (2015), "F9" (2021) va "Fast X" (2023) qismlarida ham takrorladi. Uning boshqa filmdagi rollari qatoriga "The Invisible Circus" (2001) dramasi, "D.E.B.S." (2004) jangari komediyasi va "The Texas Chainsaw Massacre: The Beginning" (2006) qo'rqinchli filmi kiradi. Brewster 2012–2014-yillarda TNT telekanalining yangilangan "Dallas" serialida suratga tushgan. Shuningdek, u FX telekanalining "American Crime Story" (2016) antologik serialining birinchi mavsumida Deniz Braun rolini ijro etgan. Bundan tashqari, u Fox telekanalining "Lethal Weapon" (2016–2018) jangari-komediya serialida doktor Morin Kaxill rolini o'ynagan.