Drew Barrymore

Drew Blythe Barrymore (1975-yil 22-fevralda tugʻilgan) — amerikalik aktrisa, rejissyor, prodyuser, tadbirkor va tok-shou boshlovchisi. U “Oltin globus” va AQSh Kinoaktyorlar gildiyasi mukofotlari sovrindori, shuningdek, “Emmi” va BAFTA mukofotlari nomzodi hisoblanadi. Aktyorlar sulolasi boʻlmish Barrymore'lar oilasiga mansub boʻlib, Jon Barrymore'ning nabirasidir. U “E.T. the Extra-Terrestrial” filmidagi roli orqali bolaligidayoq mashhurlikka erishdi. Giyohvandlik va spirtli ichimliklarga berilishi bilan kechgan qiyin bolalik davridan soʻng, u “Little Girl Lost” nomli avtobiografiyasini nashr etdi. 1990–2000-yillarda “Charlie's Angels”, “Never Been Kissed”, “Poison Ivy”, “Batman Forever”, “Scream” va “Ever After” kabi muvaffaqiyatli filmlarda suratga tushdi. Shuningdek, Adam Sandler bilan birga “The Wedding Singer”, “50 First Dates” va “Blended” kabi komediyalarda bosh rollarni ijro etdi. Uning boshqa mashhur filmlari orasida “Firestarter”, “Donnie Darko”, “Music and Lyrics”, “Big Miracle” hamda oʻzining rejissyorlik debyuti boʻlgan “Whip It” filmlari bor. “Grey Gardens” dagi roli uchun SAG va “Oltin globus” mukofotlarini qoʻlga kiritgan. Netflix'ning “Santa Clarita Diet” serialida rol oʻynagan va hozirda oʻzining “The Drew Barrymore Show” tok-shousini olib bormoqda. Barrymore oʻzining “Flower Films” nomli produserlik kompaniyasiga asos solgan va u oʻzi suratga tushgan koʻplab loyihalarni ishlab chiqargan.