Adam Sandler

Adam Richard Sandler (1966-yil 9-sentyabrda tugʻilgan) — amerikalik komediyachi, aktyor va kinoijodkor. U 1990-yildan 1995-yilgacha „Saturday Night Live“ shousining doimiy ishtirokchisi boʻlgan, shundan soʻng Hollywoodning koʻplab filmlarida suratga tushib, umumiy hisobda kinoteatrlarda 2 milliard dollardan ortiq mablagʻ yigʻishga muvaffaq boʻlgan. Sandlerning boyligi 2020-yilda taxminan 420 million dollarni tashkil etgan va u Netflix bilan qiymati 250 million dollardan oshiq boʻlgan yana toʻrtta film boʻyicha shartnoma imzolagan. Sandlerning komedik rollari sirasiga „Billy Madison“ (1995), „Happy Gilmore“ (1996), „The Waterboy“ (1998), „The Wedding Singer“ (1998), „Big Daddy“ (1999), „Mr. Deeds“ (2002), „50 First Dates“ (2004), „The Longest Yard“ (2005), „Click“ (2006), „Grown Ups“ (2010), „Just Go with It“ (2011), „Grown Ups 2“ (2013), „Blended“ (2014), „Murder Mystery“ (2019) va „Hubie Halloween“ (2020) kabi filmlar kiradi. U shuningdek, „Eight Crazy Nights“ animatsion filmida Deyvi, Uayti va Eleanorni, shuningdek, „Hotel Transylvania“ franshizasining dastlabki uchta qismida (2012–2018) Drakulani ovozlashtirgan. Baʼzi komediyalari, jumladan „Jack and Jill“ (2011) tanqidga uchrab, unga Silvester Stallonedan keyingi eng koʻp — toʻqqizta „Oltin malina“ mukofoti va 37 ta nomzod olib kelgan boʻlsa-da, u „Spanglish“ (2004), „Reign Over Me“ (2007) va „Funny People“ (2009) dramatik rollari uchun tanqidchilarning yuqori bahosiga sazovor boʻlgan. Shuningdek, Pol Tomas Andersonning „Punch-Drunk Love“ (2002), Noa Baumbaxning „The Meyerowitz Stories“ (2017) va Safdi akaukaarning filmlaridagi bosh rollari uchun ham ijobiy eʼtiroflarga sazovor boʻlgan.