Cameron Diaz

Kameron Mishel Dias (1972-yil 30-avgustda tugʻilgan) — amerikalik aktrisa. Komediya va drama janrlarida birdek muvaffaqiyat qozongan uning filmlari AQSh prokatida 3 milliard dollardan ortiq daromad keltirgan. 1990-yillarning oxiri va 2000-yillarning boshlaridagi romantik komediyalardagi rollari uni jinsiy ramz va Hollywoodning eng kassabop yulduzlaridan biriga aylantirdi. 2013-yilda Dias 40 yoshdan oshgan eng koʻp haq toʻlanadigan aktrisa deb eʼlon qilindi. U BAFTA va toʻrtta "Oltin globus" mukofotlari nomzodi boʻlgan. San-Diegoda tugʻilgan Dias Long-Bichda ulgʻaygan. Maktabda oʻqib yurgan payti u "Elite Model Management" bilan modellik shartnomasini imzolagan. Dias 21 yoshida "The Mask" (1994) komediyasida debyut qilgan. "My Best Friend's Wedding" (1997) romantik komediyasidagi yordamchi roldan soʻng, u Farrelly aka-ukalarining "There's Something About Mary" (1998) komediyasida bosh qahramonni oʻynadi va bu unga katta shuhrat hamda ilk "Oltin globus" nominatsiyasini keltirdi. Shuningdek, uning keyingi ikki loyihasi — sport dramasi "Any Given Sunday" va Spike Jonzening "Being John Malkovich" (ikkalasi ham 1999-yil) fantastik filmlari unga dramatik aktrisa sifatida eʼtirof olib keldi. Dias Kameron Krouning "Vanilla Sky" (2001) va Martin Skorsezening "Gangs of New York" (2002) filmlaridagi yordamchi rollari uchun maqtovlarga sazovor boʻldi. Shuningdek, u "Charlie's Angels" (2000) va uning 2003-yildagi davomi, hamda 2001 yildan beri "Shrek" franshizasida malika Fiona ovozini berishi orqali katta tijoriy muvaffaqiyatlarga erishdi.