Salma Hayek Pinault

Salma Valgarma Hayek Pinault — meksikalik va amerikalik aktrisa hamda kino prodyuser. U o'z faoliyatini Meksikada "Teresa" (1989–1991) teleseriali va "Midaq Alley" (1995) romantik dramasida boshlagan. Ko'p o'tmay Gollivudda o'z o'rnini topib, "Desperado" (1995), "From Dusk Till Dawn" (1996), "Wild Wild West" (1999) va "Dogma" (1999) kabi filmlarda suratga tushdi. Hayek o'zi produserlik qilgan va bosh rolni ijro etgan "Frida" (2002) biografik filmida rassom Frida Kalo obrazini gavdalantirib, Oskar mukofotiga "Eng yaxshi aktrisa" sifatida nomzodi qo'yilgan ilk meksikalik aktrisaga aylandi. Keyingi yillarda u prodyuserlikka ko'proq e'tibor qaratib bir vaqtning o'zida "Once Upon a Time in Mexico" (2003), "After the Sunset" (2004) va "Bandidas" (2006) jangari filmlarida rol o'ynadi. "Grown Ups" (2010), "Grown Ups 2" (2013) hamda "The Hitman's Bodyguard" (2017) komediyalari unga yanada katta tijoriy muvaffaqiyat keltirdi. U "Puss in Boots" (2011), "Sausage Party" (2016) va "Puss in Boots: The Last Wish" (2022) animatsion filmlarida ovoz bergan. Shuningdek, "Tale of Tales" (2015), "Beatriz at Dinner" (2017) va "House of Gucci" (2021) dramalaridagi rollari uchun tanqidchilar olqishiga sazovor bo'ldi. Marvel kinematografiya koinotining "Eternals" (2021) filmida Ajak rolini o'ynagan bo'lib, bu uning eng ko'p daromad keltirgan badiiy filmiga aylandi. Hayekning televideniyedagi rejissyorlik, prodyuserlik va aktrisalik ishlari unga to'rtta Emmy mukofoti nomzodini olib keldi. U "The Maldonado Miracle" (2004) filmi uchun "Bolalar uchun maxsus ko'rsatuvdagi eng yaxshi rejissyorlik ishi" yo'nalishida Daytime Emmy mukofotini qo'lga kiritgan. Shuningdek, u ikkita Primetime Emmy mukofotiga nomzod bo'lgan.