Jon Stewart

Jon Stewart (asl ismi Jonatan Styuart Leybovits, 1962-yil 28-noyabrda tug'ilgan) — amerikalik siyosiy satirik, yozuvchi, teleboshlovchi, aktyor, media tanqidchi va stend-ap komik. U "Comedy Central" telekanalida namoyish etiladigan "The Daily Show" hajviy yangiliklar dasturining boshlovchisi sifatida keng tanilgan. Styuart o'z faoliyatini stend-ap komik sifatida boshlagan, keyinchalik "Comedy Central"da "Short Attention Span Theater" dasturini olib borgan. Shuningdek, MTV kanalida "The Jon Stewart Show" va "You Wrote It, You Watch It" dasturlariga mualliflik qilgan. Aktyor sifatida bir qator filmlarda rol o'ynagan. 1999-yilda "The Daily Show" dasturiga boshlovchilik qila boshlagan va dasturning hammuallifi hamda ijrochi prodyuseri hisoblanadi. Uning boshlovchiligida ko'rsatuv katta mashhurlikka erishgan va 2001-yilda "Emmy" mukofotini qo'lga kiritgan. Styuart AQShdagi yirik ommaviy axborot vositalarini (CNN, Fox News va MSNBC) tanqid qilishi bilan mashhur. U 78- va 80-Akademiya (Oskar) mukofotlarini topshirish marosimlarini olib borgan. Shuningdek, "America (The Book): A Citizen's Guide to Democracy Inaction" kitobining hammuallifidir.