Elizabeth Taylor

Dame Elizabeth Rosemond "Liz" Taylor (1932-yil, 27-fevral – 2011-yil, 23-mart) — britaniyalik-amerikalik aktrisa. MGM studiyasida bolaligidan yulduzga aylangan Taylor Gollivudning "Oltin davri"dagi eng buyuk aktrisalardan biri hisoblanadi. Dunyoning eng taniqli kino yulduzlaridan biri sifatida u nafaqat aktyorlik mahorati, balki jozibali hayot tarzi, go‘zalligi va o‘ziga xos binafsharang ko‘zlari bilan ham mashhur bo‘lgan. "National Velvet" (1944) Taylorning ilk katta muvaffaqiyati edi. Shundan so‘ng u "Father of the Bride" (1950), "A Place in the Sun" (1951), "Giant" (1956), "Cat on a Hot Tin Roof" (1958) va "Suddenly, Last Summer" (1959) kabi filmlarda suratga tushgan. U "BUtterfield 8" (1960) filmi uchun eng yaxshi aktrisa sifatida Academy Award mukofotini qo‘lga kiritgan. "Cleopatra" (1963) filmida bosh rolni o‘ynagan va hamkasbi Richard Burton bilan oila qurgan. Ular birgalikda 11 ta filmda, jumladan, Taylorga ikkinchi marta Academy Award mukofotini keltirgan "Who's Afraid of Virginia Woolf?" (1966) kartinasida rol o‘ynashgan. 1970-yillarning o‘rtalaridan boshlab aktrisa kinoda kamroq ko‘rinib, televideniye va teatrda chiqishlar qila boshlagan. Taylorning shov-shuvli shaxsiy hayoti sakkiz marta turmush qurishi va jiddiy xastaliklar bilan bog‘liq bo‘lgan. 1980-yillarning o‘rtalaridan boshlab u OIV va OITSga qarshi kurash dasturlariga homiylik qilgan; 1985-yilda Amerikada OITS bo‘yicha tadqiqotlar jamg‘armasini, 1993-yilda esa Elizabeth Taylor AIDS Foundation jamg‘armasini tashkil etgan. U Prezidentlik fuqarolik medali, Faxriy legion ordeni, Jean Hersholt nomidagi gumanitar mukofot va Amerika kino instituti tomonidan berilgan umr bo‘yi erishilgan yutuqlar mukofoti sohibidir.