Agha Talish

Talish — Pokiston kinematografiyasining afsonaviy aktyorlaridan biri bo'lib, o'ziga xos xarakterli rollari bilan tomoshabinlar yodida qolgan. U 450 dan ortiq filmlarda suratga tushgan. Aktyorlik faoliyatini 1947 yilda mamlakat bo'linishidan oldin suratga olingan "Saraey Kay Baher" filmida boshlagan. 1950 yildagi "Nath" filmida ikkinchi darajali rolni ijro etgan bo'lsa, 1956 yildagi "Darbar-e-Habib" va 1958 yildagi "Touheed" lentalarida bosh qahramon obrazini gavdalantirgan. Shuningdek, "Jabroo" (1956) va "Aadmi" (1958) kabi komediyalardagi muvaffaqiyatli rollari unga katta shuhrat keltirdi. 1957 yilda suratga olingan "700.000" filmidagi mast odam roli esa uning tanilishini yanada oshirib yubordi. Talish Pokiston kinosida o'chmas iz qoldirdi. Xususan, rejissyor Xalil Qaysar va ssenariy muallifi Riyoz Shahidning 1962 yildagi "Shaheed" filmida arab cho'lidan neft topgan ingliz – Ajnabi roli uning eng sara ishlaridan biri bo'ldi. 1969 yilda prokatda rekord o'rnatgan "Zarqa" filmida esa isroillik zobit obrazini mahorat bilan ijro etgan. "Umrao Jan Ada" (1972) hamda "Zeenat" (1975) filmlaridagi Navob rollari uning ijtimoiy dramalardagi eng yaxshi ishlari sirasiga kiradi. 1977 yilda "Barey Mian Deevaney" komediyasida bosh rolni ijro etgan. Ag'a Ali Abbos Qazalbash (Ag'a Talish) 1927 yil noyabrda Hindistonning Panjob shtati Ludhiana shahrida tug'ilgan va 1998 yil 19 fevralda Lohur shahrida vafot etgan.