Özgü Namal

Melahat Özgü Namal (1978-yil 28-dekabrda tug‘ilgan) — turkiyalik aktrisa. Uning otasi tomonidan ajdodlari Shimoliy Makedoniyadan ko‘chib kelgan muhojirlardir. Özgü Namal aktyorlik faoliyatini bolaligida Masal Gerçek teatrida boshlagan. Istanbul universiteti davlat konservatoriyasining teatr bo‘limini tamomlagan. Televideniyedagi debyutini "Affet Bizi Hocam" serialida amalga oshirib, keyinchalik "Karete Can", "Yeditepe İstanbul", "Kurtlar Vadisi" (Elif Eylül roli), Orhan Kemalning asari asosida suratga olingan "Hanımın Çiftliği" hamda Hande Altaylı romani asosidagi "Merhamet" seriallarida rol o‘ynagan. 2002-yilda "Sır Çocukları" filmi bilan katta kinoga kirib kelgan. U shuningdek, "Anlat İstanbul", "Büyü", "Organize İşler", "Polis", "Beynelmilel" va "O... Çocukları" kabi filmlarda suratga tushgan. 2007-yilda "Mutluluk" filmidagi ijrosi uchun "Oltin apelsin" mukofotiga sazovor bo‘lgan.