Yves Robert

Yves Robert (1920-yil 19-iyun — 2002-yil 10-may) — fransuz aktyori, ssenariynavis, rejissyor va prodyuser. U Fransiyaning Saumur shahrida tug‘ilgan. O‘smirlik yillarida aktyorlik faoliyatini boshlash uchun Parijga ko‘chib o‘tgan va shahardagi turli teatr studiyalarida haq to‘lanmaydigan sahna rollaridan ish boshlagan. 12-20 yoshida matn teruvchi bo‘lib ishlagan, so‘ngra 20 yoshlarining boshida pantomima san’atini o‘rgangan. 1948-yilda "Les Dieux du dimanche" filmidagi ikkinchi darajali rollardan biri bilan kino olamidagi debyutini amalga oshirgan. Ko‘p o‘tmay ssenariylar yozish, film suratga olish va prodyuserlik qilish bilan shug‘ullana boshlagan. Uning rejissyorlik ishlari orasida o‘zi ssenariy yozgan bir nechta muvaffaqiyatli komediyalar bor. 1962-yilda suratga olingan "La Guerre des boutons" filmi Fransiyaning "Prix Jean Vigo" mukofotiga sazovor bo‘lgan. 1972-yilda yaratilgan "Le grand blond avec une chaussure noire" filmi esa 1973-yilda bo‘lib o‘tgan 23-Berlin xalqaro kinofestivalining Kumush ayig‘i bilan taqdirlangan. 1976-yilda rafiqasi bosh rolni ijro etgan "Un éléphant ça trompe énormément" komediyasi unga xalqaro shuhrat keltirdi. Robertning 1973-yilda suratga olingan o‘tkir hajviy "Salut l'artiste" filmi ko‘plab san’atkorlar tomonidan aktyor hayotidagi kamsitishlarni ochib beruvchi mukammal asar deb e’tirof etiladi. 1977-yilda u "César" mukofotining "Eng yaxshi film" nominatsiyasiga loyiq ko‘rilgan "Nous irons tous au paradis" komediyasini suratga oldi. 1990-yilda Robert Marcel Pagnolning avtobiografik romanlari asosida ikkita drama — "My Mother's Castle (Le château de ma mère)" va "My Father's Glory (La Gloire de mon Père)" filmlarini suratga oldi. Ushbu kartinalar 1991-yilgi Sietl xalqaro kinofestivalida birgalikda "Eng yaxshi film" deb topilgan.