Yoona

Lim YoonA — janubiy koreyalik qoʻshiqchi, raqqosa, aktrisa va GIRLS' GENERATION (SNSD nomi bilan ham tanilgan) guruhi aʼzosi. U Daeyoung oʻrta maktabini tamomlab, keyinchalik Dongguk universitetining teatr yoʻnalishi boʻyicha bakalavr darajasini olgan. Debyut qilishdan oldin u koʻplab tinglovlardan oʻtib, musiqa klip va dramalarda suratga tushgan. 2002-yilda SM Entertainment agentligining ochilish tinglovidan oʻtib, besh yil davomida stajyor sifatida shugʻullangan. U 2004-yilda TVXQ guruhining «Magic Castle» klipida suratga tushib, keng jamoatchilikka tanila boshlagan. 2007-yil avgustida guruhning yetakchi raqqosasi, repperi va vizual qahramoni sifatida «Into The New World» singli bilan debyut qilgan. Ularning shu nomdagi ilk albomi oʻsha yilning noyabrida chiqarilgan. Guruh tez fursatda butun dunyoga mashhur K-pop jamoalaridan biriga aylanib, «Millat qizlar guruhi» degan nomga sazovor boʻldi va koʻplab mukofotlarni qoʻlga kiritdi. 2009-yilda chiqarilgan «Gee» singli KBS kanalining «Music Bank» chartida rekord darajadagi toʻqqiz hafta davomida birinchi oʻrinni egallab, 2000-yillarning eng mashhur qoʻshigʻiga aylandi. Aktrisa sifatida u ilk bor 2007-yilda MBC kanalining «Two Outs in the Ninth Inning» dramasida kichik rol ijro etgan, shuningdek, 2008-yilda «Woman of Matchless Beauty, Park Jung Kum» serialida epizod rol oʻynab, matbuot va tajribali aktyorlarning olqishiga sazovor boʻlgan.