Whitney Houston

Whitney Elizabeth Houston (1963–2012) — amerikalik R&B va pop-qo'shiqchi, aktrisa va model. Guinness rekordlar kitobiga ko'ra, u tarixdagi eng ko'p mukofotlangan ayol san'atkordir. 2010-yil holatiga ko'ra, u o'z faoliyati davomida 415 ta mukofotni, jumladan 2 ta Emmy, 6 ta Grammy, 16 ta Billboard Music hamda 22 ta American Music mukofotlarini qo'lga kiritgan. U dunyo bo'ylab 170 milliondan ortiq albom va singllari sotilgan eng mashhur musiqiy ijodkorlardan biridir. Oilasidagi taniqli xonandalar — onasi Cissy Houston, amakivachchalari Dionne Warwick va Dee Dee Warwick hamda cho'qintirgan onasi Aretha Franklin ta'sirida, u 11 yoshidan Nyu-Jersidagi cherkov xorida qo'shiq kuylay boshlagan. Onasi bilan tungi klublarda chiqish qila boshlaganida, uni Arista Records leybli rahbari Clive Davis kashf etadi. Houston o'z faoliyati davomida oltita studiya albomi va uchta film saundtrekini chiqargan bo'lib, ularning barchasi olmos, multiplatina, platina yoki oltin sertifikatlariga ega. Uning 1985-yilda chiqqan ilk "Whitney Houston" albomi ayol xonandalar orasida eng ko'p sotilgan debyut albomga aylandi. 1987-yilda taqdim etilgan ikkinchi albomi "Whitney" esa Billboard 200 chartida birinchi o'rin bilan debyut qilgan birinchi ayol ijodkor albomi bo'ldi.