Vivek Oberoi

Vivek Oberoi (haqiqiy ismi Vivek Anand Oberoi) — hindistonlik aktyor, asosan hind tilidagi filmlarda suratga tushadi. Aktyor nufuzli Filmfare Awards mukofotini ikki marta qo‘lga kiritgan. Bollivud aktyori Suresh Oberoining o‘g‘li. U kino olamidagi ilk qadamini 2002-yilda Arvind Khoja va Ram Gopal Varmaning "Company" superxiti bilan qo‘ygan. Bu ijrosi uchun u bir qancha mukofotlarga, jumladan, "Eng yaxshi debyut" va "Eng yaxshi ikkinchi plandagi aktyor" nominatsiyalari bo‘yicha Filmfare mukofotiga sazovor bo‘lgan. "Saathiya" (2002), "Masti" (2004), "Kaal" (2005) va "Shootout at Lokhandwala" (2007) filmlaridagi rollari unga katta muvaffaqiyat keltirdi. Aktyorlikdan tashqari, Oberoi xayriyachi sifatida ham tanilgan. U Project Hope doirasidagi ishlari uchun Rotary International tashkilotining Good Samaritan mukofoti hamda 2006-yilda sunami zarar yetkazgan qishloqni qayta tiklashga ko‘maklashgani uchun Red and White Bravery mukofoti bilan taqdirlangan. U JSSTning tamakiga qarshi kurash elchisi hisoblanadi. Shuningdek, u Project Devi, saraton kasalligiga chalingan bemorlarga yordam uyushmalari hamda uysiz, ruhiy xastaligi bor ayollarni reabilitatsiya qilish bilan shug‘ullanuvchi Banyan kabi loyihalarda faol ishtirok etadi. U sahna chiqishlarida qatnashgan va "India's Best Dramebaaz" realiti-shousida hakamlik qilgan. KARRM Infrastructures kompaniyasining asoschisi.