Tony Dalton

Alvaro Luis Bernat “Tony” Dalton (1975-yil 13-fevralda tugʻilgan) — amerikalik va meksikalik aktyor. Faoliyatining asosiy qismida Meksika filmlari, teleseriallari va teatr sahnalarida rol oʻynagan. AQShda u asosan “Better Call Saul” (2018–2022) serialidagi Lalo Salamanca obrazi orqali tanilgan. Shuningdek, u 2021-yilda suratga olingan Marvel kinematografiya koinotining “Hawkeye” mini-serialida Jek Dukesne rolini ijro etgan. Alvaro Luis Bernat Dalton 1975-yil 13-fevralda Texas shtatining Laredo shahrida amerikalik ona va meksikalik otas oilasida tugʻilgan. U Massachusets shtatining Dirfild shahridagi Eaglebrook maktabida oʻqigan, soʻngra Nyu-York shahridagi Li Strasberg nomidagi teatr va kino institutida aktyorlik sirlarini oʻrgangan. Daltonning ilk yirik roli Meksikaning “Rebelde” (2004–2006) telenovelasida boʻlgan. Uning kinodagi ilk roli oʻzi hammualliflik qilgan “Matando Cabos” (2004) filmi hisoblanadi. Keyinchalik u “Sultanes del Sur” (2007) filmiga ssenariy yozgan va unda bosh rolni ijro etgan. Uning boshqa kinoijod namunalari qatoriga “Violanchelo” (2008) va “The Perfect Dictatorship” (2014) kiradi. Shuningdek, u HBO Latin America telekanalining “Capadocia” (2008) serialida ikkinchi darajali rolni oʻynagan. U Xalqaro “Emmi” mukofotiga sazovor boʻlgan HBO telekanalining “Sr. Ávila” (2017) serialida bosh rolni ijro etgan. Dalton “Better Call Saul” (2018–2022) serialida Lalo Salamanca rolini oʻynab, ilk bor 4-mavsumning “Coushatta” qismida koʻrinish bergan. Uning ijrosi tanqidchilar tomonidan ijobiy baholanib, Screen Actors Guild mukofotiga va ikkita Saturn mukofotiga nomzod qilib koʻrsatilgan, ayrim tanqidchilar esa Laloni televideniyedagi eng yaxshi yovuz qahramonlardan biri deb topgan.