Titos Vandis

Titos Vandis (1917–2003) — yunon aktyori. Ijodiy faoliyatini 1930-yillarning oxirida Gretsiya sahnalarida boshlagan. 1962-yilda Saloniki xalqaro kinofestivalida “Poliorkia” filmi uchun “Eng yaxshi aktyor” mukofotiga sazovor bo‘lgan. Mamlakatda diktatura o‘rnatilgach, Gretsiyani tark etib, 24 yil davomida AQSHda yashagan. 250 dan ortiq spektakllarda ishtirok etgan Titos Brodveydagi debyutini “On A Clear Day You Can See Forever” (1965) myuziklida qilgan. Shuningdek, u “Never on Sunday” (1960) filmi asosida sahnalashtirilgan “Illya Darling” (1967) myuziklining dastlabki tarkibida rol o‘ynagan. 1970-yilda “Man of La Mancha” myuziklida Sancho Pansa rolini ijro etgan, bundan tashqari Nyu-Jersi shtatidagi “Zorba” myuziklida bosh qahramon obrazini gavdalantirgan.