Tina Turner

Tina Turner (1939-yil 26-noyabr – 2023-yil 24-may) — faoliyati 50 yildan ortiq davom etgan amerikalik qoʻshiqchi va aktrisa. Sahnadagi gʻayrat-shijoati, kuchli ovozi, ijodiy uzoq umr koʻrgani va ommaviyligi bilan tanilgan Turner "Rok-n-roll qirolichasi" deya eʼtirof etilgan va Rolling Stone jurnali tomonidan "barcha zamonlarning eng buyuk xonandalaridan biri" deb topilgan. Uning albom va singllari umumiy hisobda dunyo boʻylab 160 milliondan ortiq nusxada sotilgan boʻlib, ijodiy faoliyati davomida tarixdagi har qanday yakkaxon ijrochiga qaraganda koʻproq konsert chiptalarini sotgan. Turner musiqa olamidagi faoliyatini turmush oʻrtogʻi Ike Turner bilan birgalikda Ike & Tina Turner Revue guruhida boshlagan. Keyinchalik "River Deep, Mountain High" hamda 1971-yilgi "Proud Mary" kabi xit tarona va treklari bilan katta muvaffaqiyatga erishdi. U 1986-yilda chop etilgan "I, Tina" nomli avtobiografiyasida 1976-yildagi ajralishidan oldin Ike Turner tomonidan muntazam ravishda kaltaklangani va zoʻravonlikka uchraganini oshkor qilgan. Ike bilan ajrashgandan keyin bir necha yil musiqa sahnasidan deyarli yoʻqolib qolganidan soʻng, u oʻz faoliyatini qaytadan tikladi va 1983-yilda "Let's Stay Together" singli hamda 1984-yilda beshinchi yakkaxon albomi boʻlgan "Private Dancer" bilan mashhurlikka erishdi. Musiqiy faoliyatidan tashqari, Turner vaqti-vaqti bilan kinoda ham oʻzini sinab koʻrdi. U 1975-yilgi "Tommy" filmidagi "Kislotali qirolicha" (The Acid Queen) roli va "Sgt. Pepper's Lonely Hearts Club Band" filmidagi chiqishi bilan aktrisalikka qadam qoʻydi.