Tim Roth

Timothy Simon Roth — ingliz aktyori va rejissyori. U 1961-yil 14-mayda tug‘ilgan. Roth 1995-yilda suratga olingan «Rob Roy» filmidagi roli uchun BAFTA mukofotini qo‘lga kiritgan hamda «Oskar» va «Oltin globus» mukofotlariga nomzod bo‘lgan. «Made in Britain» (1982) va «Meantime» (1983) nomli televidenie loyihalaridagi ishi bilan e'tibor qozongach, Roth o‘zining kinodagi ilk roli — «The Hit» (1984) filmidagi ijrosi uchun BAFTA’ning «Eng istiqbolli debyutant» mukofotiga nomzod bo‘lgan. Shundan so‘ng u «The Cook, the Thief, His Wife & Her Lover» (1989), «Vincent & Theo» hamda «Rosencrantz & Guildenstern Are Dead» (ikkalasi ham 1990) kabi filmlardagi rollari bilan yanada kengroq tanildi. Roth Kventin Tarantino bilan bir nechta filmlarda, jumladan, «Reservoir Dogs» (1992), «Pulp Fiction» (1994), «Four Rooms» (1995) va «The Hateful Eight» (2015) kartinalarida hamkorlik qilgan. Shuningdek, uning filmografiyasidan «The Legend of 1900» (1998), «Planet of the Apes» (2001), «Funny Games» (2007), «Selma» (2014), «Luce» (2019) va «Bergman Island» (2021) kabi kinolar o‘rin olgan. Roth o‘zining rejissyorlik debyutini «The War Zone» (1999) filmi bilan amalga oshirgan. U Fox telekanalining «Lie to Me» (2009–2011) serialida Kel Laytman, Sky Atlantic telekanalining «Tin Star» (2017–2020) serialida Jim Uort / Jek Devlin obrazlarini ijro etgan, shuningdek, Marvel kinematografiya koinotining «The Incredible Hulk» (2008), «Shang-Chi and the Legend of the Ten Rings» (2021) filmlari va Disney+’ning «She-Hulk: Attorney at Law» (2022) serialida Emil Blonskiy / Maxluq rolini o‘ynagan.