Tilda Swinton

Ketrin Matilda Suinton (1960-yil 5-noyabrda tugʻilgan) — shotland millatiga mansub britaniyalik aktrisa, mustaqil filmlar va blokbasterlardagi turfa xil rollari bilan tanilgan. U oʻz faoliyati davomida «Oskar» va ikkita BAFTA mukofotini qoʻlga kiritgan, shuningdek, uchta «Oltin globus» va beshta Kinoaktyorlar gildiyasi mukofotiga nomzod boʻlgan. Suinton faoliyatini 1986-yilda suratga olingan «Karavadjo» eksperimental filmidan boshlagan, keyinchalik «Angliyaning soʻnggi kunlari» (1988), «Urush rekviemi» (1989) va «Bogʻ» (1990) kabi kartinalarda suratga tushgan. U «Eduard II» (1991) filmidagi Fransiya qirolichasi Izabella roli uchun Venetsiya kinofestivalining «Eng yaxshi aktrisa» kubogini qoʻlga kiritdi. Shundan soʻng Salli Potterining «Orlando» (2002) filmida bosh rolni ijro etib, Yevropa kino mukofotiga nomzod boʻlgan. «Tubanlik» (2001) filmidagi ijrosi uchun «Oltin globus»ga loyaqat koʻrsatilib, «Vanilla Sky» (2001), «Adaptatsiya» (2002), «Konstantin» (2005), «Julia» (2008) va «Men muhabbatman» (2009) kabi filmlarda suratga tushgan. U «Yosh Odam» (2003) filmi uchun Shotlandiya Britaniya akademiyasi mukofotiga sazovor boʻlgan. «Maykl Kleyton» (2007) filmidagi roli esa unga «Oskar» va BAFTA mukofotlarini olib keldi. Bundan tashqari, u «Kevin haqida gaplashishimiz kerak» (2011) psixologik trilleri uchun Yevropa kino mukofotini qoʻlga kiritib, BAFTA mukofotiga ham nomzod etib koʻrsatilgan.