The Kid LAROI

Charlton Kennet Jeffri Govard (2003-yil 17-avgustda tug‘ilgan), The Kid Laroi nomi bilan tanilgan — avstraliyalik rapchi va qo‘shiqchi. U dastlab Avstraliyadagi gastrol safari chog‘ida amerikalik rapchi Juice Wrld bilan tanishib, e'tibor qozongan. Lil Bibbiga tegishli Grade A Productions va Columbia Records studiyalari bilan shartnoma imzolashdan avval u mahalliy darajada muxlislar orttirgan. U butun dunyoga tanilishiga 2021-yilda Justin Bieber bilan birgalikda kuylagan "Stay" treki sabab bo‘ldi. Ushbu qo‘shiq o‘zining vatanidagi Avstraliya chartlari, shuningdek, Canadian Hot 100 va Billboard Hot 100 ro‘yxatida birinchi o‘rinni egallagan. Uning debyut miksteypi F*ck Love (2020) Avstraliyaning ARIA chartlarida cho‘qqiga chiqib, uni mazkur marraga erishgan eng yosh avstraliyalik yakkaxon artistga aylantirdi va AQShning Billboard 200 chartida ham birinchi o‘rinni egalladi. Miksteyp ikkita qayta nashr etilgan versiyani taqdim etdi: birinchisi F*ck Love: (Savage) deb nomlanib, unda uning ilk xiti bo‘lgan va amerikalik qo‘shiqchi Miley Cyrus bilan remiks qilingan hamda Billboard Hot 100’ning kuchli o‘ntaligiga kirgan "Without You" qo‘shig‘i joy olgan; ikkinchisi esa F*ck Love 3: Over You (2021) deb atalib, o‘z ichiga "Stay" trekini olgan. Uning ilk studiyaviy albomi The First Time (2023) chiqishidan oldin "Love Again" va Jungkook hamda Central Cee bilan birgalikdagi "Too Much" singllari taqdim etildi va albom iliq kutib olindi. Govardning aytishicha, u bitta musiqa janri bilan cheklanib qolmaydi, ham rap, ham pop yo‘nalishida ijod qilishni yaxshi ko‘radi.