Tatyana Ali

Tatyana Marisol Ali (1979-yil 24-yanvarda tugʻilgan) — amerikalik aktrisa va qoʻshiqchi. U asosan "The Fresh Prince of Bel Air" sitkomidagi Eshli Benks roli bilan tanilgan. U toʻrt yoshidan qoʻshiq kuylay boshlagan va onasidan oʻzini "Sesame Street" koʻrsatuvi kastingiga olib borishini qattiq iltimos qilib, ilk bor mashhurlik lazzatini tatib koʻrgan. 1985-yilda, 6 yoshida PBS telekanalining "Sesame Street" bolalar taʼlimiy dasturida doimiy ishtirok etib, aktrisalik faoliyatini boshlagan. Keyinchalik oʻzining tugʻilib oʻsgan shahri Nyu-Yorkda koʻplab sahna asarlarida, jumladan, Jeyms Erl Jons va keyinchalik Billi Di Uilyams bilan birga Brodveyning "Fences" hamda Brodveyldan tashqaridagi "Orfeo del Campo" spektakllarida rol oʻynagan. Yetti yoshida "Star Search" tanuvida qatnashib, ikki marta gʻolib chiqqan va ikkinchi chiqishida toʻrt yulduzli reytingni qoʻlga kiritgan. 11 yoshida karyerasini davom ettirish uchun Nyu-Yorkdan Los-Anjelesga koʻchib oʻtgan va koʻp oʻtmay "The Fresh Prince of Bel-Air" (1990–1996) sitkomida Uill Smit qahramonining amakivachchasi Eshli Benks rolini ijro etib, katta muvaffaqiyatga erishgan. "Fresh Prince" serialida suratga tushish barobarida, "The Cosby Show" (1984), "The All New Mickey Mouse Club" (1989), "Kyno's Storytime" (1992), "Are You Afraid of the Dark?" (1990) va "Foster's Field Trip" (1994) kabi teledasturlarda ham mehmon sifatida qatnashgan. Serialning keyingi mavsumlarida uning vokal qobiliyati ham namoyon boʻla boshladi. Bu esa bosh rol ijrochisi Uill Smitga unga musiqa sohasida jiddiy faoliyat boshlashni maslahat berishiga sabab boʻldi.