Türker İnanoğlu

Türker İnanoğlu (18-may 1936 — 2-aprel 2024) — turkiyalik ssenariychi, kinorejissyor va prodyuser. U kino olamiga 1957-yilda Istanbul amaliy san'at akademiyasida talabalik davrida kirib kelgan. Ömer Lütfi Akat va Nişan Hançer kabi rejissyorlarga 11 ta filmda yordamchilik qilgach, 1960-yilda o'zining ilk «Senden Ayrı Yaşayamam» nomli to'liq metrajli filmini suratga oldi. «Turk Gollivudi» deb ataladigan Yeşilçam studiyasida 9 ta filmga rejissyorlik qilganidan so'ng, 1959-yilda o'zining «Erler Film» kompaniyasiga asos soldi. Bugungi kunda bu Turkiyaning faoliyatini to'xtatmagan eng qadimiy kinostudiyasi hisoblanadi. U shu vaqtgacha 126 ta film (oq-qora va rangli) prodyuseri bo'lgan, ularning 21 tasi Gretsiya, Italiya va Eron bilan hamkorlikda yaratilgan. Shuningdek, xorijlik ijodkorlarning Turkiyada suratga olingan hujjatli filmlariga prodyuserlik qilgan. U jami 82 ta filmga rejissyorlik qilgan. 1979-yilda Turkiyada birinchi «Ulusal Video» kompaniyasini ochib, video sanoatiga asos soldi. Uning kompaniyasi mahalliy filmlarni Turkiyadagi va xorijdagi 1500 ga yaqin video klublarga yetkazib berdi va turk kinosi chuqur iqtisodiy inqirozga uchragan davrda besh yil davomida soha saqlanib qolishiga katta hissa qo'shdi. 1985-yilda televizion yangiliklar va ko'ngilochar dasturlar uchun maxsus studiya tashkil etdi. U yerda o'sha davrdagi yagona telekanal — TRT uchun «Bir Başka Gece», «Hodri Meydan», «Gecenin getirdikleri» kabi juda mashhur dasturlarni tayyorladi.