Svetlana Zakharova

Rossiya xalq artisti, Rossiya davlat mukofoti laureati, Rossiya Katta teatri primabalerinasi, La Skala yulduzi Svetlana Zaxarova Lutskda (Ukraina) tugʻilgan. U 10 yoshida Kiyev xoreografiya bilim yurtiga oʻqishga kirgan. Valeriya Sulegina sinfida olti yil tahsil olgach, Sankt-Peterburgda oʻtkazilgan yosh raqqosalarning xalqaro "Vaganova Prix" tanlovida qatnashgan va eng yosh balerina boʻlgan. Shundan soʻng, 15 yoshida Svetlana ikkinchi mukofotni qoʻlga kiritgan. Tanlovdan keyin u Sankt-Peterburgdagi mashhur Vaganova nomidagi balet akademiyasining taklifini qabul qilgan. U ikkinchi sinfni tashlab, toʻgʻridan-toʻgʻri bitiruv sinfiga oʻtgan va bu taʼlim muassasasi tarixida yagona holat edi. Zaxarova darhol eʼtiborni tortdi va olti oy oʻtgach, Mariinskiy teatrida "Don Kixot" baletida yakkaxon partiyani ijro etish taklifini qabul qildi. Elena Yevteyeva sinfining bitiruvchisi klassik baletdagi eng murakkab rollardan biri — Driadlar malikasi partiyasini mukammal ijro etdi. Shu tariqa rus baletining yosh yulduzi porlay boshladi. Oʻn yetti yoshida Svetlana Vaganova akademiyasini tamomladi va koʻp oʻtmay Mariinskiy teatrining afsonaviy balet truppasiga qabul qilindi. Svetlanani Mariinskiy teatrining koʻzga koʻringan ustozi, mashhur balerina va Rossiya xalq artisti Olga Moiseyeva payqab qoldi. Uning rahbarligida Zaxarova ilk bor "Don Kixot"da Mariya rolini ijro etdi.