Sofia Coppola

Sofia Carmina Coppola (1971-yil 14-mayda tug‘ilgan) — amerikalik kinoijodkor va sobiq aktrisa. U «Oscar», ikkita «Golden Globe», «Golden Lion» va Kann kinofestivali mukofotlari sovrindori, shuningdek, BAFTA va «Primetime Emmy» mukofotlariga bir necha bor nomzod bo‘lgan. Eleanor va Frensis Ford Coppola oilasida dunyoga kelgan Sofia ilk bor go‘dakligida otasining «The Godfather» (1972) kriminal dramasida suratga tushgan. Keyinchalik musiqiy kliplarda ko‘rinish berib, «Peggy Sue Got Married» (1986) filmida ikkinchi darajali rolni ijro etgan va «The Godfather Part III» (1990) filmida Meri Korleone obrazini yaratgan. 1999-yilda «The Virgin Suicides» dramasi bilan rejissyorlik debyutini amalga oshirgan. Uning filmlari ko‘pincha Amerikadagi yolg‘izlik, boylik, tengsizlik, yoshlik va o‘smirlik davri muammolariga bag‘ishlanadi. «Lost in Translation» (2003) filmi uchun «Eng yaxshi ssenariy» nominatsiyasida «Oscar»ni qo‘lga kiritgan va «Eng yaxshi rejissyor» nominatsiyasiga ko‘rsatilgan tarixdagi uchinchi ayol bo‘lgan. U shuningdek, «Marie Antoinette» (2006), «Somewhere» (2010), «The Bling Ring» (2013), «The Beguiled» (2017) va «On the Rocks» (2020) kabi filmlarni suratga olgan.