Sanjay Leela Bhansali

Sanjay Leela Bhansali (1963-yil, 24-fevral) — hind kinorejissori, prodyuser, ssenariynavis va bastakor. U o‘ziga xos hashamatli dekoratsiyalar, dabdabali liboslar, mumtoz musiqa va epik dramatik ruhdagi ayollar yetakchiligidagi filmlari bilan tanilgan. Hind kinosining eng nufuzli ijodkorlaridan biri bo‘lib, to‘rt marotaba Milliy kino mukofoti, o‘n marotaba Filmfare mukofoti hamda 2015-yilda Hindiston hukumatining Padma Shri davlat mukofotiga sazovor bo‘lgan. Rejissyorlik debyuti – "Khamoshi: The Musical" (1996) filmi uchun Filmfare tanqidchilar mukofotini olgan. Uning "Hum Dil De Chuke Sanam" (1999), "Devdas" (2002) va "Black" (2005) filmlari katta muvaffaqiyat qozongan. Hindiston kino va televidenie institutini tamomlagan. Bhansali Productions prodyuserlik kompaniyasi asoschisi.