Sandra Bullock

Sandra Annette Bullock (1964-yil 26-iyulda tug‘ilgan) — amerikalik aktrisa va prodyuser. 2010 va 2014-yillarda dunyoning eng ko‘p maosh oluvchi aktrisasi bo‘lgan Bullock ham komediya, ham dramatik janrlarda faol. U «Oskar» va «Oltin globus» mukofotlari sovrindori hamda 2010-yilda Time jurnali tomonidan dunyoning eng nufuzli 100 kishisi ro‘yxatiga kiritilgan. Aktyorlik debyutini «Hangmen» (1987) trilleridagi kichik rol bilan boshlagan Bullock, «Demolition Man» (1993) jangari filmidagi ikkinchi darajali roli orqali e’tibor qozongan. «Speed» (1994) jangari trilleridagi ijrosi unga katta muvaffaqiyat keltirdi va ketma-ket «While You Were Sleeping» (1995) romantik komediyasi, «A Time to Kill» (1996) hamda «Hope Floats» (1998) dramalarida bosh rollarni ijro etdi. Keyingi o‘n yilliklarda u «Miss Congeniality» (2000), «Two Weeks Notice» (2002), «The Proposal» (2009), «The Heat» (2013), «Ocean's 8» (2018) va «The Lost City» (2022) komediyalari; «Crash» (2004) va «The Unforgivable» (2021) dramalari; hamda «Premonition» (2007) va «Bird Box» (2018) trillerlarida muvaffaqiyatli rollarni o‘ynadi. «The Blind Side» (2009) biografik dramasida Leigh Anne Tuohy obrazini yaratib, «Oskar» mukofotini qo‘lga kiritgan. Shuningdek, o‘zining eng kassabop filmi bo‘lgan «Gravity» (2013) ilmiy-fantastik trilleridagi roli uchun ham «Oskar»ga nomzod bo‘lgan. Aktyorlikdan tashqari, Bullock «Fortis Films» prodyuserlik kompaniyasiga asos solgan va o‘zi suratga tushgan bir qator filmlar, jumladan «Miss Congeniality 2» filmining prodyuseri bo‘lgan.