Robert Zemeckis

Robert Li Zemekis (1952-yil 14-mayda tugʻilgan) — muvaffaqiyatli va ta'sirli filmlari bilan tanilgan amerikalik kinoijodkor. U hikoya qilish san'atini ilgʻor vizual effektlar bilan mohirlik bilan uygʻunlashtiradi. Zemekis "Oskar" va "Oltin globus" mukofotlari bilan taqdirlangan, shuningdek BAFTA hamda "Emmy" mukofotlariga nomzod boʻlgan. Kino karyerasini komediya janridagi "I Wanna Hold Your Hand" (1978), "Used Cars" (1980) va "Romancing the Stone" (1984) filmlari bilan boshlagan. U ilmiy-fantastik komediya janridagi "Back to the Future" trilogiyasi (1985–1990), "Who Framed Roger Rabbit" (1988) fantastik komediyasi hamda "Forrest Gump" (1994) komedik-dramasi orqali katta shuhrat qozondi. Oxirgi filmi uchun u "Eng yaxshi film" va "Eng yaxshi rejissyor" yoʻnalishlarida "Oskar" mukofotini qoʻlga kiritgan. Shuningdek, u "Death Becomes Her" (1992) qora komediyasi, "Contact" (1997) ilmiy-fantastik filmi hamda "Cast Away" (2000), "Flight" (2012), "The Walk" (2015) va "Allied" (2016) kabi dramalarni suratga olgan. Uning harakatni yozib olish (motion capture) texnologiyalaridan foydalangan ishlari sirasiga "The Polar Express" (2004) va "A Christmas Carol" (2009) animatsion filmlari, "Beowulf" (2007) hamda "Welcome to Marwen" (2018) dramatik filmlarini kiritish mumkin. Zemekis 1984-yildan beri kompozitor Alan Silvestri bilan hamkorlik qilib keladi va Tom Henksni beshta filmiga bosh rolga tanlagan.