Rishi Kapoor

Rishi Raj Kapoor — hindiy tilidagi filmlari bilan tanilgan hindistonlik aktyor, rejissyor va prodyuser. 50 yillik ijodiy faoliyati davomida u ko‘plab nufuzli mukofotlarga, jumladan, Milliy kino mukofotiga sazovor bo‘lgan. Kapoorlar oilasida dunyoga kelgan aktyor ilk bor otasi Raj Kapoorning “Mera Naam Joker” (1970) filmida suratga tushib, “Eng yaxshi bolalar roli” uchun Milliy kino mukofotini qo‘lga kiritgan. U kattalar safidagi ilk bosh rolini “Bobby” (1973) o‘smirlar romantik filmida Dimple Kapadia bilan birga ijro etgan va bu roli uchun “Filmfare” mukofotiga loyiq ko‘rilgan. 1973-yildan 2000-yilgacha Kapoor 92 ta filmda romantik qahramon obrazini yaratdi. “Khel Khel Mein” (1975), “Kabhi Kabhie” (1976), “Amar Akbar Anthony” (1977), “Sargam” (1979), “Karz” (1980), “Prem Rog” (1982), “Saagar” (1985), “Nagina” (1986), “Chandni” (1989), “Henna” (1991) va “Deewana” (1992) kabi filmlar uning faoliyatidagi eng esda qolarli asarlar sirasiga kiradi. U “Do Dooni Chaar” (2010) filmidagi ijrosi uchun “Filmfare” tanqidchilar mukofotini olgan. 2008-yilda esa “Filmfare”ning umrboqiy muvaffaqiyat mukofoti bilan taqdirlangan. Aktyorning oxirgi filmi — “Sharmaji Namkeen” (2022) u vafotidan so‘ng ekranlarga chiqarilgan. Aktrisa Neetu Singh bilan suratga olish maydonchasida tanishgan. Ularning ikki farzandi bor. Rishi Kapoor 2020-yil 30-aprelda 67 yoshida leykemiya xastaligi tufayli vafot etgan.