Rihanna

Robyn Rihanna Fenty (1988-yil 20-fevralda tugʻilgan) — Barbadoslik qoʻshiqchi, tadbirkor va aktrisa. U Ginnesning rekordlar kitobiga koʻra 21-asrning eng koʻp sotilgan ayol qoʻshiqchisi va Amerika Ovoz yozish sanoati assotsiatsiyasi (RIAA) tomonidan eng yuqori sertifikatlangan raqamli singllar ijrochisi sifatida eʼtirof etilgan. 2024-yil holatiga koʻra, Rihanna dunyodagi uchinchi eng badavlat musiqachi hisoblanadi. Uning AQShda olmos sertifikatini olgan yettita singli va "Billboard Hot 100" roʻyxatida birinchi oʻrinni egallagan 14 ta singli mavjud. Turli mukofotlar sovrindori boʻlgan Rihanna umumiy hisobda 250 millionga yaqin nusxada albomlari sotilgan barcha davrlarning eng koʻp sotilgan ijrochilaridan biridir. Rihanna 2005-yilda Def Jam Recordings studiyasi bilan shartnoma imzolagan. U oʻzining "Music of the Sun" (2005) va "A Girl Like Me" (2006) nomli dastlabki ikki studiyaviy albomini chiqargach, keng jamoatchilikka tanildi. Ikkala albomga ham Karib dengizi musiqasi taʼsir koʻrsatgan boʻlib, ular AQShning "Billboard 200" chartida kuchli oʻntalikka kirgan. Uning uchinchi albomi "Good Girl Gone Bad" (2007) ga dens-pop elementlari singdirilib, uni popikona maqomiga koʻtardi. Albomning asosiy singli "Umbrella" AQShning "Billboard Hot 100" chartida choʻqqiga chiqdi va unga ilk "Grammy" mukofotini olib keldi. Rihanna oʻzining keyingi "Rated R" (2009), "Loud" (2010), "Talk That Talk" (2011) va "Unapologetic" (2012) albomlarida pop, dens hamda boshqa yoʻnalishlarni uygʻunlashtirishni davom ettirdi, jumladan oxirgi albomi "Billboard 200" chartida birinchi oʻrinni egalladi. Ushbu albomlardan "Rude Boy", "Only Girl (In the World)", "What's My Name?", "S&M", "We Found Love" kabi "Billboard Hot 100" yetakchisi boʻlgan singllar oʻrin olgan.