Ridzuan Hashim

Mohd Ridzuan bin Hashim (1961-yil 13-avgust — 2023-yil 4-may) — malayziyalik aktyor. Ijodini podium modellari va reklama roliklaridan boshlagan. 1990-yillarda mahalliy film va teleseriallardagi ijrosi orqali tanilib, o'ziga xos aktyorlik mahorati uchun bir nechta mukofotlarni qo'lga kiritgan. Kino olamidagi ilk debyutini rejissyor Rosnani Jamilning “Antara Dua Hati” (1988) filmida bosh rollar ijrochilari Raja Ema va Sabree Fadzil bilan birga boshlagan. Shundan so'ng u “Beyond Rangoon” (1995) filmida Ofitser Min roli orqali Gollivudda ham o'z debyutini qildi. U televideniedagi “Evolusi KL Drift: The Series” hamda “Evolusi KL Drift” (2008) jangari seriallarida Karim rolini ijro etdi. Shuningdek, “Don 2” (2011) filmida Jaruwan roli orqali Bollivudda ham suratga tushdi. Uning eng yorqin ishi “KL Gangster” (2011) filmidagi asosiy salbiy qahramon — King roli bo'ldi. Filmning ulkan muvaffaqiyatidan so'ng u bu rolni “KL Gangster 2” (2013) va “Rise to Power: KLGU” (2019) filmlarida ham davom ettirdi. U 2023-yil 4-may kuni Kuala-Lumpur kasalxonasida (HKL) yurak xurujidan vafot etdi. Uning jasadi Selangor shtatining Hulu Langat tumanidagi Dusun Tua islom qabristoniga dafn qilindi.