Ricky Martin

Enrique «Ricky» Martín Morales (1971-yil 24-dekabrda tug‘ilgan) — puerto-rikolik xonanda, qo‘shiqnavis va aktyor. Musiqiy janrlardagi xilma-xilligi, jumladan, lotin-pop, raqs, reggaeton va salsa uslublaridagi ijodi bilan mashhur. San-Xuanda tug‘ilgan Martin to‘qqiz yoshidan televizion reklamalarda ko‘rinib, 12 yoshida «Menudo» bolalar guruhida musiqiy faoliyatini boshlagan. 1991-yildan yakka ijodga o‘tib, «Ricky Martin» (1991) va «Me Amaras» (1993) albomlari bilan Lotin Amerikasida tanilgan. Uchinchi albomi «A Medio Vivir» (1995) va xalqaro xitga aylangan «María» qo‘shig‘i unga Yevropada shuhrat keltirdi. 1998-yilda chiqargan «Vuelve» albomi uchun ilk «Grammy» mukofotini oldi. 1999-yilda chiqarilgan «Ricky Martin» ingliz tilidagi albomi AQSHning Billboard 200 chartida birinchi o‘rinni egalladi va «Livin' la Vida Loca» qo‘shig‘i dunyo bo‘ylab mashhurlikka erishdi. Martinning 90-yillar oxiridagi muvaffaqiyati «Lotin portlashi» (Latin explosion) davrining boshlanishi sifatida baholanadi.