Richard Low

Singapurda yaxshi tanilgan Richard Low ijod faoliyatini teatrda boshlagan. Keyinchalik u o'sha paytdagi Singapur teleradiokorporatsiyasi (hozirgi MediaCorp) tashkil etgan Professional drama aktyorlarini tayyorlash kursini tamomlab, 1986-yilda telekanal bilan shartnoma imzolagan. Faoliyatining boshida u asosan salbiy qahramonlarni gavdalantirgan. Bir qolipdagi rollarda qolib ketishdan qo'rqmay, hamkasblaridan ikki chandon ko'p mehnat qildi. Tinimsiz izlanishlar evaziga Richard 1997-yilda "The Silver Lining" filmidagi roli uchun "Star Awards" mukofotining "Eng yaxshi ikkinchi plandagi aktyor" unvoniga sazovor bo'ldi. 1999-yilda "Mr. OK" filmida bosh rolni ijro etgach, tomoshabinlar uni boshqacha kashf etishdi va faqat ikkinchi darajali aktyor degan qarashni o'zgartirishdi. Produserlar ham uning mahoratiga e'tibor qaratib, o'z loyihalariga taklif qila boshlashdi. Ikkinchi yirik muvaffaqiyat 2002-yilda rejissor Jack Neo tomonidan suratga olingan va kassa rekordlarini o'rnatgan "I Not Stupid" komediyasidagi badavlat tadbirkor roli bo'ldi. Film bir nechta kinofestivallarda iliq kutib olindi va hozirgacha Singapurning eng ko'p daromad keltirgan TOP-5 filmlari qatoriga kiradi. Muvaffaqiyat ortidan shu yilning o'zida uning serial versiyasi ham yaratildi. Shundan so'ng Richard "The Best Bet" va "Singapore Dreaming" kabi mahalliy badiiy filmlarda suratga tushdi. 2012–2013-yillarda u Jack Neo'ning kassabop "Ah Boys To Men" filmida muhim rollardan birini ijro etdi.