Riccardo Cocciante

Riccardo Cocciante (1946-yil 20-fevralda tug'ilgan), fransuz tilida so'zlashuvchi mamlakatlar va AQShda Richard Cocciante nomi bilan ham tanilgan — asli italiyalik va fransuz bo'lgan qo'shiqchi va bastakor. Cocciante 1946-yil 20-fevralda Fransuz Indochinasining Kaygon shahrida (hozirgi Xoshimin, Vetnam) tug'ilgan. Otasi L'Aquila provinsiyasidagi Rokka-di-Mezzo shahridan bo'lgan italyan, onasi esa fransuz edi. 11 yoshida Italiyaning Rim shahriga ko'chib o'tib, u yerdagi L'cée français Chateaubriand maktabida o'qigan. Shuningdek, u Fransiya, AQSh va Irlandiyada yashagan. Cocciante 1983-yildan buyon Catherine Boutet bilan turmush qurgan. Ularning bir nafar farzandi bor. R&B janrining ashaddiy muxlisi bo'lgan Cocciante o'zining musiqa faoliyatini organ cholg'u asbobida ijro etishdan boshlagan va 1960-yillarning oxirlaridan Rimdagi chet ellik talabalar uchun mo'ljallangan L'Approdo klubida qo'shiq kuylay boshlagan. Marco Luberti va Paolo Casella bilan birgalikda GL6 guruhini tuzgach, 1971-yilda Richard Cocciante fransuzcha taxallusi bilan professional faoliyatini boshlagan va Carlo Lizzanining "Roma Bene" filmi uchun uchta inglizcha qo'shiq yozgan. 1972-yilda u Italiyada "MU", Fransiyada esa "Atlantì" nomli ilk albomini chiqardi. 1973-yilda chiqqan "Poesia" albomi o'rtacha muvaffaqiyat qozongach, bir yil o'tib uning ijodida burilish yasaldi — "Bella senz'anima" qo'shig'i katta hitga aylandi. Biroq bu tarona seksist deb topilib, munozaralarga sabab bo'ldi va hatto Italiya televideniyesida efirga uzatilishi taqiqlandi. 1976-yilda u o'zining tashrif qog'oziga aylangan "Margherita" qo'shig'i bilan yana Italiya xit-paradlari cho'qqisini egalladi. O'sha yili u The Beatles guruhining qo'shig'ini kaver qilib kuylagan.