Raoul Bova

Raoul Bova (1971-yil 14-avgustda tug‘ilgan) — italiyalik aktyor. Rimda tug‘ilib o‘sgan aktyor 16 yoshida suzish bo‘yicha (chalqancha usulda 100 metr) mahalliy chempion bo‘lgan. 21 yoshida Italiya armiyasi safiga qo‘shilib, Bersaglieri korpusida xizmat qilgan. Italiya jismoniy tarbiya institutida (ISEF) o‘qigan bo‘lsa-da, aktyorlik faoliyatini tanlab, o‘qishni tark etgan. Rimdagi Beatrice Bracco maktabida va Maykl Margotta qo‘l ostida aktyorlik saboqlarini olgan. 2000-yil mart oyida Chiara Giordano bilan turmush qurgan; ularning Alessandro Leon, Franchesko va Sofiya ismli farzandlari bor. 2010-yil 15-oktyabrda BMTning Oziq-ovqat va qishloq xo‘jaligi tashkiloti (FAO)ning xayriya elchisi etib tayinlangan.