Picha

Jan-Pol "Picha" Valravens (1942-yil 2-iyul, Bryussel, Belgiya) — belgiyalik multiplikator, komiks rassomi va rejissyor. U ko‘proq kattalar uchun ishlangan "Tarzoon: Shame of the Jungle" animatsion filmi bilan tanilgan. Chizmachilikka qiziqqan Jan-Pol Avliyo Luk tasviriy san'at institutida tahsil olgan. 1960-yillardan boshlab butun dunyo nashrlarida, jumladan "National Lampoon" va "The New York Times" gazetalarida karikaturachi sifatida faoliyat yurita boshlagan va aynan shu davrda Picha taxallusini olgan. Keyinchalik komikslar yaratishga o‘tib, "Picha at Club Med" (1971) va "Persona non grata" (1975) kabi asarlarni yozgan. 1975-yilda Edgar Rays Berrouzning Tarzan haqidagi hikoyalariga parodiya tarzida suratga olingan "Tarzoon: Shame of the Jungle" animatsion filmini hammuallif sifatida boshqargan. Film Belgiya va Fransiyada katta muvaffaqiyat qozongan, biroq mualliflik huquqi egalari bilan plagiat masalasida sudlashishga majbur bo‘lgan. Sudda ijodkorlar film parodiya ekanligini isbotlagan bo‘lsalar-da, AQSHdagi namoyish vaqtida tarzan nomiga putur yetkazilgani uchun film nomi va bosh qahramon ismi o‘zgartirilishi talab qilingan. Natijada 1979-yilda film qayta tahrirlanib, "Shame Of The Jungle" nomi bilan taqdim etilgan.