Phil Collins

Filip Devid Charlz Kollinz (1951-yil, 30-yanvar) — ingliz xonandasi, barabanchi, qo'shiqnavis, prodyuser va aktyor. U “Genesis” rok guruhida barabanchi, keyinchalik esa solist sifatida faoliyat yuritgan. Yakka ijodkor sifatida u Buyuk Britaniyada uchta va AQShda yettita xit singlga erishgan. 1980-yillar davomida u “Genesis” tarkibidagi va yakka ijro etgan qo'shiqlari bilan AQSh top-40 ro'yxatida boshqa istalgan san'atkordan ko'ra ko'proq o'rin egallagan. Uning eng mashhur singllari orasida “In the Air Tonight”, “Against All Odds (Take a Look at Me Now)”, “One More Night”, “Sussudio”, “Another Day in Paradise”, “Two Hearts” va “I Wish It Would Rain Down” kabi taronalar bor. G'arbiy Londonda tug'ilib o'sgan Kollinz besh yoshidan barabanda chalishni boshlagan. Shu davrda u drama maktabida o'qib, bolalar aktyori sifatida turli rollarni ijro etgan. Uning ilk yirik roli “Oliver!” musiqiy spektaklidagi Artful Dodger obrazi edi. O'smirlik chog'ida tajribali aktyor bo'lishiga qaramay, u musiqa olamini tanladi va 1970-yilda “Genesis” guruhiga barabanchi sifatida qo'shildi. Piter Gebriel ketganidan so'ng, 1975-yilda u guruhning bosh xonandasiga aylandi. 1970-yillarning ikkinchi yarmida, “Genesis” guruhidagi tanaffuslarda u “Brand X” jazz-rok guruhida baraban chalgan. 1980-yillarda “Genesis” bilan ijod qilish barobarida, shaxsiy hayotidagi qiyinchiliklar va soul janriga bo'lgan muhabbati ta'sirida yakka faoliyatini boshlagan.