Nikos Foskolos

Nikos Foskolos (1927-yil 26-noyabr – 2013-yil 30-oktabr) — yunon ssenariy muallifi va rejissyori. U yunon kinosining tijoriy jihatdan eng muvaffaqiyatli ssenariynavistlaridan biri hisoblanadi. Uni "tijoriy shoularning Oltin qo'li", shuningdek, "bo'rttirish ustasi" va "televideniye shoulari qiroli" deb atashgan. Uning "Ipolochagos Natassa" filmi deyarli o'n yillik — 1970-yildan 1999-yilgacha eng yuqori kassa yig'imi rekordini saqlab qolgan. Foskolos 1927-yil 26-noyabrda Afinada tug'ilgan. Afina universitetida siyosatshunoslik yo'nalishida o'qigan, ammo o'qishni tamomlamagan. 17 yoshidan boshlab tarixiy va zamonaviy mavzulardagi muvaffaqiyatli radio-pyesalar yoza boshlagan. Uning "Politsiya hikoyalari" radioseriali uch yil davomida eng ommabop radioasarlardan biri bo'lgan. 1960-yillarda u teatr tanqidchisi sifatida ishlagan, shuningdek, teatr va radiolar uchun pyesalar yozgan. Asosan Finos Film studiyasi bilan hamkorlik qilib, 70 dan ortiq yunon filmlari ssenariysini yozgan. U yunon kinosiga Spagetti-vester janrini olib kirgan. Uning kundalik "Lampsi" teleseriali ulkan muvaffaqiyat qozonib, 14 mavsum davom etgan va 1995-yilda Ginnesning rekordlar kitobiga kiritilgan. Shuningdek, u o'n yil davomida ikkita kundalik teleserial — "Lampsi" va "Kalimera Zoi"ni yozgani uchun yana bir bor Ginnes rekordlari safiga qo'shilgan. "Lampsi" 1991-yildan 2005-yilgacha 13 yil davomida namoyish etilib, jami 3457 qismdan iborat bo'lgan. 1970-yillarda uning "Agnostos Polemos" (Noma'lum urush) teleseriali yunon xonadonlarining 92 foizi ekran qarshisiga to'planishini ta'minlab, tomoshabinlar reytingi bo'yicha rekord o'rnatgan.