Neha Kakkar

Neha Kakkar — hindistonlik ijrochi xonanda, qo‘shiqchi Sonu Kakkarining singlisi. U juda yoshligidan diniy tadbirlarda qo‘shiq kuylay boshlagan. 2005-yilda "Indian Idol" realiti-shousining ikkinchi mavsumida ishtirok etdi. Bollivuddagi debyutini "Meerabai Not Out" filmida xor xonandasi sifatida qilgan. "Cocktail" filmidagi "Second Hand Jawaani" raqs treki unga katta muvaffaqiyat keltirdi, keyinchalik "Yaariyan" filmidagi "Sunny Sunny" va "Queen" filmidagi "London Thumakda" kabi ommabop qo‘shiqlari bilan tanildi. Musiqa bilan bir qatorda, Kakkar bir nechta musiqiy videolarda va "Indian Idol" kabi televizion loyihalarda hakam sifatida ishtirok etgan. 2019-yilda YouTube'da 4,2 milliard marta ko‘rilgan eng mashhur ayol artistlar qatoridan joy oldi. 2021-yil yanvarida YouTube'ning "Olmos mukofoti"ni olgan birinchi hindistonlik xonandaga aylandi. U 2017 va 2019-yillarda Forbes jurnalining Hindistonning 100 ta mashhur yulduzi ro‘yxatiga, 2020-yil dekabrida esa Osiyoning 100 ta raqamli yulduzi ro‘yxatiga kiritilgan.