Natalia Bessmertnova

Sovet va rus balerinasi, balet o‘qituvchisi. SSSR xalq artisti (1976). Lenin mukofoti (1986), SSSR Davlat mukofoti (1977) hamda Lenin komsomoli mukofoti (1972) laureati. Katta teatr (Bolshoy teatr) primasi. Baletmeyster Yuriy Grigorovichning rafiqasi. SSSR Oliy Kengashi deputati (1979–1984). Natalya Bessmertnova 1941-yil 19-iyulda Moskvada shifokor Igor Bessmertnov va uy bekasi Antonina Bessmertnova oilasida dunyoga kelgan. U Moskva xoreografiya bilim yurtini tamomlagan. Ustozlari Mariya Kojuxova, Sofya Golovkina va L.K.Cherkasova qo‘l ostida professional mahoratini oshirgan. 1961-yilda bilim yurtini a’lo baholarga bitirib, Katta teatr truppasiga qabul qilingan. U o‘zining betakror raqs uslubi, yengil sakrashlari va nafis harakatlari bilan ajralib turgan. Ijodiy hamkori Mixail Lavrovskiy bilan birgalikda “Jizel” baletidagi bosh rolni ijro etib, 1963-yil 20-noyabrdagi chiqishidan so‘ng tomoshabinlar e’tirofini qozongan.