Nas

Nasir bin Olu Dara Jons (1973-yil 14-sentyabrda tug'ilgan), Nas taxallusi bilan tanilgan, amerikalik reper va tadbirkor. Sharqiy qirg'oq xip-xop yo'nalishining yorqin vakili sifatida u barcha davrlarning eng buyuk va ta'sirli reperlaridan biri hisoblanadi. Jazz musiqachisi Olu Daranning o'g'li bo'lgan Jons musiqiy faoliyatini 1989-yilda «Nasty Nas» taxallusi ostida boshlagan. U 1991-yilda «Main Source» guruhining «Live at the Barbeque» treki orqali tanilgan. Nasning «Illmatic» (1994) nomli ilk albomi tanqidchilar tomonidan yuqori baholangan va barcha davrlarning eng yaxshi xip-xop albomlaridan biri deb tan olingan; 2021-yilda albom Kongress kutubxonasining Milliy yozuvlar reestriga kiritildi. Uning «It Was Written» (1996) ikkinchi albomi «Billboard 200» chartida birinchi o'rinni egallab, to'rt hafta davomida yetakchilik qilgan va «If I Ruled the World (Imagine That)» singli bilan birgalikda Nasga xalqaro muvaffaqiyat keltirgan. 1999-yilda chiqqan «I Am» va «Nastradamus» albomlari esa tijoriy yo'nalishi tufayli tanqidlarga uchragan. 2001-2005-yillarda Nas Jey-Zi bilan mashhur ziddiyatga kirishgan, bu «Ether» diss-treki orqali keng yoyilgan. Aynan shu ziddiyat hamda «Stillmatic» (2001), «God's Son» (2002) va «Street's Disciple» (2004) albomlari orqali u o'zining nufuzini qayta tikladi.