Naomi Watts

Naomi Ellen Watts (1968-yil 28-sentyabrda tugʻilgan) — britaniyalik aktrisa. Alejandro González Iñárrutuning «21 Grams» (2003) filmidagi qaygʻuga botgan ona roli hamda «The Impossible» (2012) katastrofa filmidagi Maria Bennett obrazi uchun “Eng yaxshi aktrisa” yoʻnalishida ikki marta “Oskar” mukofotiga nomzod boʻlgan. Oilasi Avstraliyaga koʻchib oʻtgach, u oʻzining kinochilikdagi ilk rolini «For Love Alone» (1986) dramasida ijro etgan, shuningdek, «Hey Dad..!» (1990), «Brides of Christ» (1991), «Home and Away» (1991) teleseriallarida va «Flirting» (1991) filmida suratga tushgan. AQShga koʻchib oʻtgandan soʻng, u dastlab aktrisa sifatida qiyinchiliklarga duch kelib, kichik byudjetli filmlarda rol oʻynagan, jumladan, David Lynchning 2001-yilda suratga olingan «Mulholland Drive» psixologik trillerida bosh rolni ijro etgan. Aynan shu rol uning xalqaro miqyosda tanilishiga yoʻl ochdi. U Birlashgan Millatlar Tashkilotining OITS boʻyicha qoʻshma dasturi (UNAIDS) va Pantene brendining «Beautiful Lengths» aksiyasida elchi sifatida faoliyat yuritgan.