Mohanlal

Mohanlal Vishwanathan Nair yoki shunchaki Mohanlal — hind kinosining ko'p qirrali va tabiiy ijrosi bilan tanilgan hind aktyori, prodyuser va xonandasi. U o'zining kino faoliyatini ekran yuzini ko'rmagan «Thiranottam» (1978) filmida boshlagan, ilk namoyish etilgan filmi esa 1980-yildagi «Manjil Virinja Pookkal» bo'lib, unda salbiy qahramon rolini o'ynagan. Bir necha salbiy rollardan so'ng, u komediya va jangari filmlarda turli xil personajlarni ijro etib, yetakchi aktyor sifatida o'z o'rnini mustahkamladi. 1986-yilda «Rajavinte Makan» filmidagi jinoyatchi don roli muvaffaqiyatidan so'ng, uni Malayalam kinosining superyulduzi deb atay boshlashdi. 1990-yilda «His Highness Abdullah» musiqiy hiti bilan prodyuserlik faoliyatini boshlagan. Shuningdek, tamil va Bollywood filmlarida ham suratga tushgan, jumladan, Mani Ratnamning «Iruvar» va Ram Gopal Varmaning «Company» filmlaridagi rollari bilan mashhur. Aktyorlik va prodyuserlikdan tashqari, u kino distribyutsiyasi, restoran va ziravorlar savdosi bilan ham shug'ullanadi. Mohanlal hind kinosining eng yaxshi aktyorlaridan biri va Kerala shtatining madaniy belgisi hisoblanadi. 2006-yilda CNN-IBN so'rovnomasida Kerala shtatining eng mashhur shaxsi deb topilgan. 2001-yilda Hindiston hukumati uni hind kinosiga qo'shgan hissasi uchun mamlakatning to'rtinchi eng oliy fuqarolik mukofoti bo'lgan Padma Shri bilan taqdirlagan.