Michael Shannon

Maykl Korbett Shannon (1974 yil 7 avgustda tug'ilgan) — amerikalik aktyor, prodyuser, musiqachi va teatr rejissyori. U Sem Mendesning "Revolutionary Road" (2008) tarixiy dramasi hamda Tom Fordning "Nocturnal Animals" (2016) psixologik trilleridagi rollari uchun ikki marta "Oskar" mukofotining "Eng yaxshi ikkinchi plandagi aktyor" nominatsiyasiga da'vogar bo'lgan. Shuningdek, u "99 Homes" (2014) filmidagi roli uchun SAG va "Oltin globus" mukofotlari nomzodiga, Brodveyda sahnalashtirilgan Yugjin O'Nilning "Long Day's Journey into Night" (2016) spektaklidagi roli uchun esa " Toni" mukofotiga sazovor bo'lgan. Shannon kino olamidagi debyutini 1993 yilda "Groundhog Day" filmi orqali amalga oshirgan va "8 Mile" (2002) filmidagi ijrosi bilan keng e'tirof qozongan. U komediya va dramalarda birdek muvaffaqiyatli o'ynaydigan serqirra aktyor sifatida tanilgan. Uning ijodiy merosiga "Pearl Harbor" (2001), "Bad Boys II" (2003), "Bug" (2006), "Before the Devil Knows You're Dead" (2007), "Bad Lieutenant: Port of Call New Orleans" (2009), "The Iceman" (2012), "Premium Rush" (2012), "The Night Before" (2015), "The Shape of Water" (2017) va "Knives Out" (2019) kabi filmlar kiradi. U "Man of Steel" (2013) hamda "Batman v Superman: Dawn of Justice" (2016) filmlarida Supermening kriptonlik raqibi general Zod rolini o'ynagan va bu obrazni "The Flash" (2022) filmida ham takrorlagan. Shannon rejissyor Jeff Nichols bilan yaqin hamkorlik qilib, uning barcha: "Shotgun Stories" (2007), "Take Shelter" (2011), "Mud" (2012), shuningdek, "Midnight Special" va "Loving" (ikkisi ham 2016 yil) filmlarida suratga tushgan. Shuningdek, u HBO kanalining "Boardwalk Empire" tarixiy dramatik serialidagi Nelson Van Alden roli bilan ham tanilgan.