Maurice Chevalier

Maurice Auguste Chevalier (1888-yil 12-sentabr – 1972-yil 1-yanvar) — fransuz aktyori, estrada xonandasi va shoumen. U o‘zining "Livin' In The Sunlight", "Valentine", "Louise", "Mimi" va "Thank Heaven for Little Girls" kabi qo‘shiqlari hamda "The Love Parade", "The Big Pond", "The Smiling Lieutenant", "One Hour with You" va "Love Me Tonight" filmlaridagi rollari bilan tanilgan. Uning o‘ziga xos qiyofasi – qayiqchi shlyapasi va smokin g‘i bilan ajralib turgan. Parijda tug‘ilgan Chevalier ijodiy faoliyatini yoshligida qo‘shiqchi va raqqos sifatida boshlagan. 1909-yilda Fransiyaning o‘sha davrdagi eng mashhur aktrisasi Fréhel bilan hamkorlik qiladi. Bu hamkorlik qisqa bo‘lsa-da, u Marseldagi l'Alcazar sahnasida taqlidchi va xonanda sifatida debyut qilishiga yo‘l ochadi. 1917-yilda jazz va regtaymga qiziqib, Londonga boradi va u yerda Palace Theatre sahnasida katta muvaffaqiyatga erishadi. Keyinchalik AQShga gastrollar uyushtirib, George Gershwin va Irving Berlin kabi kompozitorlar bilan tanishadi hamda 1922-yilda "Dédé" operettasini Brodveyga olib chiqadi. Ovozli kinolar davri boshlanishi bilan Gollivudga ko‘chib o‘tadi va 1928-yilda "Innocents of Paris" filmida ilk amerikalik rolini ijro etadi. 1930-yilda "The Love Parade" va "The Big Pond" filmlaridagi ijrosi uchun "Oskar" mukofotiga nomzod bo‘lgan.