Matyoqub Matchonov

Matyoqub Matchonov (1956-yil 26-noyabr, Toshkent) — o‘zbek teatr va kino aktyori, o‘zbek sanʼati va kinosining eng nufuzli namoyandalaridan biri. Aktyor bo‘lish orzusi bilan maktabni bitirgach, Toshkent teatr va sanʼat institutiga o‘qishga kirgan. Kinodagi ilk qadamini 1980-yilda «Dahoning yoshligi» filmida qo‘ygan. O‘qishni tamomlagach, 1985-yilda «Yosh gvardiya» teatrida professional faoliyatini boshlagan. «Bozor ko‘rmagan yigit» filmidagi roli bilan butun mamlakatga tanilgan va isteʼdodli komedik aktyor sifatida muxlislar eʼtiborini qozongan. U o‘z faoliyati davomida komediya, drama va boshqa janrlarda o‘ziga xos uslubi va yorqin obrazlari bilan tanilgan. Matchonov o‘zbek kinosining faol ijodkorlaridan biri bo‘lib, yaqinda Sarvar Karimovning «Farz» (2025) dramasida Tohir Saidov va Sayyora Yunusova bilan birga bosh rollarni ijro etdi. Aktyorlikdan tashqari, O‘zbekiston kinoijodkorlar uyushmasi raisi sifatida o‘zbek kinosi rivojiga katta hissa qo‘shib kelmoqda. «Do‘stlik» ordeni sohibi hamda O‘zbekiston xalq artisti unvoniga sazovor bo‘lgan.