Mary J. Blige

Mary Jane Blige (1971-yil, 11-yanvar) — amerikalik xonanda, qo'shiqnavis, aktrisa va xayriyachi. Faoliyatini 1989-yilda Uptown Records kompaniyasida bek-vokalchi sifatida boshlagan. U 13 ta studiyaviy albom chiqargan, ulardan sakkiztasi dunyo bo'ylab multi-platinum maqomiga erishgan. 80 milliondan ortiq plastinkalari sotilgan xonanda to'qqizta Grammy, to'rtta American Music Awards va o'n ikkita Billboard Music Awards mukofotlari sohibi. "Mudbound" (2017) filmidagi roli va shu film uchun yozilgan "Mighty River" qo'shig'i bilan uch karra Oltin globusga nomzod bo'lgan. Shuningdek, u bir yilning o'zida ham aktyorlik, ham qo'shiqnavislik yo'nalishlari bo'yicha Oskar mukofotiga nomzod bo'lgan tarixdagi birinchi shaxsdir. 1992-yilda debyut albomi "What's the 411?"ni taqdim etgan. "My Life" (1994) albomi Rolling Stone va Time jurnallari tomonidan barcha davrlarning eng yaxshi albomlari qatoriga kiritilgan. 2006-yilda World Music Awards'da "Legends Award", 2007-yilda esa ASCAP'ning "Voice of Music Award" mukofoti bilan taqdirlangan. Billboard nashri uni so'nggi 25 yildagi eng muvaffaqiyatli R&B/Hip-Hop ayol ijrochisi deb e'tirof etgan.