Mark Herman

Mark Herman (1954-yilda Angliyaning Bridlington shahrida tug'ilgan) — ingliz kinorejissori va ssenariynavisi. U 2008 yilda suratga olingan "The Boy in the Striped Pyjamas" filmi uchun ssenariy muallifi va rejissor sifatida tanilgan. Mark Shimoliy Yorkshirdagi Woodleigh maktabida o'qigan. U kino olamiga kechroq kirib kelgan. 27 yoshida san'at kollejida multfilmlar chizib yurgan va keyinchalik Lids politexnika institutida kino san'atini o'rganib, drama yo'nalishiga kirib kelgan (hozirgi Lids Metropolitan universiteti). So'ngra Londondagi Milliy kino maktabida animator mutaxassisligi bo'yicha tahsil olgan. Animatsiyadan uzoqlashib, rejissorlikni davom ettirgan. Shuningdek, u The Christians guruhi uchun qo'shiq matnlarini yozgan. Hermanning ilk to'liq metrajli ishi — Daddli Mur va Brayan Braun bosh rollarni ijro etgan "Blame It on the Bellboy" (1992) komediyasi bo'lgan. Shundan so'ng Herman konchilar ish tashlashidan keyingi og'ir davrda omon qolishga intilayotgan mis-nafas cholg'u ansambli a'zolari haqidagi "Brassed Off" (1996) nomli tanqidchilar e'tirofiga sazovor bo'lgan filmni yozdi va suratga oldi. Jim Kartraytning pyesasi asosida suratga olingan "Little Voice" (1998) filmida Jeyn Horroks otasining xotiralari va u hayratda qolgan xonandalarga taqlid qilish orqali qiyinchiliklardan qochishga urinadigan bosh qahramon obrazini gavdalantirgan. Ushbu film Maykl Keynga o'z faoliyatidagi eng yaxshi rollardan birini ijro etish imkoniyatini berdi. Jonatan Tallokning romani asosida Herman tomonidan ekranga moslashtirilgan "Purely Belter" (2000) ikki o'smir bola haqidagi hikoyadir.